اللقاحات المخملية

قالت محدثة النعمة لصديقتها ثرية الحرب:

لتكوني مفكره انو أنا ممكن أخود من هل الفاكسانات (اللقاحات) الشرشوحه اللي مو معروف قرعة أبوها من وين, أنا غير فاكسين(لقاح) أميركي مية بالمية ما باخود.

أجابتها صديقتها :

تصوري اخود انا والشغالة تبعي نفس (الفاكسان) ,وتصوري يدروا جماعتنا بها القصة وتصل لبيروت وننفضح هون وهنيك

فقاطعتها صديقتها قائلة: بس عفوا حبيبتي اسمو اللقاح فاكسين مو فاكسان

 فأجابتها لأ ياغشيمه" هوه نفسو بس هيك اسمو بالفرنساوي.

فقالت لها صديقتها ايه الله يرحم الوالد اللي حبس امك بقن الجاج شوكان يحكي فرنساوي.

ثم أضافت: بس ياجوجو بتعرفي انو سهير طلعت اقوى مني ومنك وراح تروح هيه وجوزا على دبي وحجزوا اسبوعين ببرج خليفة لياخدو الفاكسان الأكابري هنيك وطبّلوا الدنية انستغرام وتويتر ومويتر وما ضل حدا الا دري بها القصة  وخدي بعدين لما بيرجعوا وبيطرشو الدنيه صور وبوزات وحفلات والذي منو,

وأضافت:عرفتيه جوجو الذي منو

فأجابتها ايه عرفتو...؟       

روت المدّلكة, التي كانت تدلّك جوجو, لزوجها جانبا من هذا الحوار فسألها مستغربا:

ليش اللقاح تبع الكورونا فيه منو للأكابر وللأصاغر, وفي منو بلحمه ومنو بجاج وفي منو بسمنه و منو بزيت

 بس الله يلعن ابو هالزمان اللي خلا الحمار يصير حصان وخلا الصرمايه تصير شمعدان.