أمونه... إيه الأسباب

 

كان كيلو البندورة  بليرة صار بخمس تلاف وكان ليتر المازوت بكم ليرة صار بكم ألف وكان وكان وكان... ولأزيدك من الشعر بيتا أقول :

((كان أغلى بيت بالشام بميت ألف و صار بمليار وكان سليمان الدفش يشتغل على طنبر مازوت صار عندو كازيات وكان عبدو االنص وأحيانا ينادولوا عبدو اللص يبيع 3مشاط بليرة بسوق الحميدية صارتاجر جملة كبير بالسوق وسمعان طف الجرن كان موظف استعلامات صغير صار تمشي معه سيارات ويركب بالطيارات فيرست كلاس))

 واللي طلق مرتو اللي عاشت معو ع القلة والفقر والشحططة ببيوت الأجار وتزوج وحدة أصغر من بناتو وصاريشتي بدبي و يصيف بجبل لبنان  ويشار إليه بالبنان واللي متزوج أكتر من وحدة ومن عشيقة لعشيقة وشاليات وكباريهات, واللي كان متدين بطل واللي كان مبطل تدين وناس عم تطلع السلم درجة درجة وختيرت ولساتا بأول السلم وناس نطت نطة وحدة وصارت فوق وناس كانت فوق ولساتا فوق وناس كانت تحت ولساتا تحت

والدنيا  لاتصدق أنها دولاب وبيدور لأنو كثيرين مافي شي عندون عم يدور غير راسون ومافي شي عندون عم يمشي غير رجليون

فلاتتعب نفسك وتبحث عن الأسباب فستتوه وتدوخ أكثر مما أنت دايخ مرددا مع المطرب شفيق جلال:

أمونه بعتلها جواب

أمونه ولا سألت فيا

أمونه ماتردي عليا

 إيه الأسباب

هذا ناهيك عن البلاوي الزرقا التي ستصيبك لويبّست راسك وأصريت في البحث عن الأسباب