|
المتسيسات المخمليات.....يتحاورن
بسام طالب
|
||
|
( المتسيسة : هي التي نزلت كار السياسة دون " احم ولا دستور " أي أصابتها لوثة السياسة فجأة " متل الموت الفجة " والمتسيسات معظمهن مخمليات وربما زهقن من نيلهن كل مايصبّنّ اليه فولجن المعترك السياسي بدافع المزيد من التألق والشهرة والتشاوف والمتعة والإمتاع . والمتسيسة غير المتيسة رغم التشابه الكبير في حروفهما ولفظهما مع ان لكل متسيسة نصيب من التياسة لسببين أولهما اعتقادها أنها " صارت تفهم " لمجرد نزولها " ع المقدور " ونقصد كار السياسة والسبب الاخر هو خليط من الغيرة والنرجسية والحمق والجهل ورحم الله ابن رشد حين قال لوسكت الجهلاء لقل الخلاف) حوار بين متسيسة ورفيقتها شفتيني مع فيتالي نعومكين ومنو هادا فيتالي نعومكين هادا اللي اجا محل لافروف وليش دخلك ما اجا لافروف يمكن لقاهن مو قد المقام ايه كله الوفد الطويل العريض مو قد المقام
شو بيعرفني, المهم شو عم يحكوا العالم والله مو كتير, بس حكو عن فلانة انو زعلانة لانو ما حطوه فرست كلاس متل الوفد الرسمي وكمان ما عطوه خصم محرز عتكيت الطيارة معقول طيب يطلع الوفد الرسمي والوفد المعارض بطيارة وحدة وعلى حساب الحكومة, بتصير كتير تخينه تخينه ولارفيعة ,اخر همي ,بس بتعرفي مين اللي كان بيجنن من الوفد الرجالي هادا اللي كل شعروا بيضو ما تعدما للحشة الحمرا الطويلة اللي بيتغاوا فيها وهيه على رقبتو هي لحشه ولاشال ؟ لحشه ولا شال ولا تيرشرش ,المهم أنو الرجال كتير شارمنغ (جذاب) واكابري.
بالمناسبة صحيح انو رفيقتك ما رضيت تلبس سينية حتى ما يعلقوا عليها كمان هالمرة بالعكس اشترت اواعي نضالية خصوصي لهالمناسبهة وشو يعني اواعي نضالية يعني اواعي مشرشحة متل تبع الشعب لاتستغربي حبيبتي هدول من الجماعة اللي بيعملوا حفلات من نمرة ( نواندر وير بارتي) ( حفلة بلا اواعي داخلية ) ونزلوا بالمقدورعلى كارالسياسة من باب الدلع والذي منو. ولسا ما شفتيشي ,لكان وحدة منها لشلة بتنبطح على كنباية وبتتصور فيديو من فوق لتحت ومن تحت لفوق. وتلتارباع صدرها باين وتمها الواسع اللي مغطي كل وشا طالستو بالحمرا وعمتتلوى وتتأوه وتتغنج , وقال عمتدافع عن الاسلام ,منشان ربك في اوقح وأقبح وابذئ من هيك.
دخيلك يسطفلو بس بدك الحق الوفد تبعكن ما بيبيض الوش منوب ومو مبينلو راس من رجلين وكلمين عم يغني على ليلو وكأنو حمام مقطوعة ميتو. الحق معك ,بس سمعتي شو قالوا عن فلانة انها معارضة اليفه, أيه بوس ايدك اليفة ولا متوحشه, كم ميت مليون لون صارت هالمعارضة شي لطيفة وشي ظريفه وشي معتدلة وشي موتورة وشي ناعمةوشي خشنه وشي موالية وشي نص كم وشي عالريحة وشي سادة وشي اسلامية وشي متأسلمة وشي علمانية وشي متعولمة وشي متأمركة وشي متمركسة ,وعدي اذا فيكي تعدي بتصدقي انو في كتير قعدوا هون لانو ما لقوا محل هنيك وفلانة كانت بدها تعمل نايت كلاب فما زبطت فعملت حزب وهداك كان بدو يعلقلوا كم سيخ شاورما ويفتح مطعم قام لقى أكّسب وأوجّه يعمل تجمع واللي عمل منتدى واللي عمل تيار واللي لساتو عم يبحث عن خيار وعلى ذكر الخيار بتعرفي حبيبتي انو في مين فات عالسياسة ومابيعرف الفرق بين الخيار الاستراتيجي والخيار البلدي وفلانة صارت محللة سياسية وعمرا ما قرت جريدة ولا سمعت نشرة أخبار وما بتعرف من التحاليل غير تبع الحمل والمخابر الطبية وهاداك اللي طول عمرو عايش على طاولة السلطان وانتقل للخندق الاخر بكل براءة وأمان ,والتانية اللي كانت عم تدور على كرسي بالصفا لا ولعند الحكومة ولما مازبطت معها راحت تتنطوط عالضفة التانية حتى وصلت للامريكان واللي شافوا حظه مبكزاخست انو اللي (عم يحمو) بباريس ونيسو كانو اللهي لعن هالزمان
وكمان وكمان صرتي تسمعي بناشطين وناشطات واغلبهم كانوا شافطن وشافطات ناهيكي عن هدول الكاسيات العاريات المائلات المميلات اللي صار الوطن وترابو واطفال الوطن وشبابو وبردىو الربوة وخرابو, مجبول بدمون وماشي بشراينون وهنن اكذب من مسيلمة الكذاب , والوطن طول عمرو اخر همون وما تذكروه الا وقت ما عاد قدروا يحلبوه ويجلبوه ويا حرام قديش انكذب باسمك وعليك يا وطن ويا حرام كيف اختلط الحابل بالنابل ويا حرام كيف ضاع الصالح بين رجلين الطالح. وبالأخير ما حدا خسر غيرك يا وطني ويا حسرتي علينا وعليك يا بلد
| ||
ما هو تقيمكم لموقع وجريدة الدبور